خاصني نعترف واقيلة بلي أنا مغيارة... نقدر نغير على أي حاجة كنمتلكها... ولا حتى كتمتلكني... ولكن داكشي اللي وقع، ماشي حيت غرت على الأسرار اللي قال لي وبغيتهوم لي بوحدي... كانت شي حاجة كتر من هادشي... راني عشت مع كل حاجة عاودها لي... تأثرت من قلبي وهزيتليه الهم وتمنيت ليه شحال من حاجة شحال من ليلة قبل ما ننعس وما عمرني فكرت ولا نفكر نخرج ولو شي حاجة صغيرة من اللي تقال... حيت طرف منو هاداك... هو بوحدو اللي عندو الحق يعريه... لمن ما بغا... وقتما بغا... غير ما يضحكش علي... ما يقولش ليا هادشي عمرني قدرت نقولو... انت اللي قدرت نخوي عليك... بقا فيا الحال بزاف... حسيت براسي كنخبي وكنغطي فشي حاجة هو مامسوقش ليها... حسيت بالتقوليبة... وبان لي راسي مختلفة تاني وما عمرني غادي نتفاهم مع شي حد...
كيفاش الناس كيشوفو الأسرار شي حاجة رخيصة... كيفاش هو عاود تفاصيل على حياتو ما مضطرش يقولها للعالم كامل... كيفاش خوا بيا... وكيفاش هي عاود ليها وطلبها ما توصلش ليا الهضرة ودغيا وصلاتها ليا... ما بقيت عارفة الديفو فيا ولا فيهوم... واش انا بصح اللي كنكبر الأمور كيف كايقولو... ولا هوما كايصغروها...
تعصبت بزاف وكانت المدابزة الاولى اللي غادي تخليه يشوف وجهي الخايب... وبقا كيطلب السماحة وأكد لي بلي حتى شي حد ما عارف الديتاي وبلي نقدر نتأكد من عندهأ... حلف لي بلي أنا الوحيدة اللي عارفة كلشي على حياتو وبلي داكشي اللي عرفات كان غير أجوبة قصار على أسئلتها... اعترف لي بلي الغلط الوحيد اللي دار هو قال ليها : اه، كنبغيها و هي لا... وحلف لي بلي ندم وماكرهش "يقتلها" حيت هي السباب فأنه يخسرني...
ندى كنعرفها... فيها التسوال بزاف وما كاتحشمش تقلقل فشي حوايج... ولكن واخا هاكاك... على الاقل يحترم الرغبة ديالي وما يبيننيش فخباري كلشي وساكتة... كان ممكن يعاود ليها بلا ما يقول ليها فكل مرة "راني معاود ليها كلشي... راها عارفة كلشي..."... لا، ما غاديش نقبل هادي... راه غالط... غالط فكولشي... وعارف راسو قفرها معايا... وماغاديش يقدر يقنعني...
الغد ليه خرجت مع الدار، وجلست مع اختي واحد الوقت وجبداتو ليا... قالت لي شكون هاداك... عمرني سمعتك هضرتي عليه... ولقيت راسي بديت نعاود ليها... هي الوحيدة اللي كنقدر نتيق فيها وماكرهتش تقول لي شنو بان ليها... عاودت ليها عليه وصافي، بلا مانوقف فداكشي اللي طرا مع ندى... بحال ادا ما بغيتش نبين ليها داكشي الخايب اللي كتاشفت... باقي عندي أمل نفهم شي حاجة اخرى ولا نسيق الخبار لشي ديتاي نفهم بيه بلي كيف قال : "راه ما كرهش العالم كامل يسيق الخبار بلي كيبغيني وما فاهمش لاش كنعقد الأمور..."
عاودت ليها على شي حوايج بلا ما نعطي تفاصيل... المعاناة ديالو والمسؤولية اللي هز من صغرو... تقريبا عرفات شي حوايج يقدرو يعرفوها جيرانو ولا صحابو اللي ما قرابش ليه... ولكن، لقيت راسي كنرسم صورة زوينة... ما عاودتش بموضوعية الصراحة... بحال ادا كنت باغا نوصل ليها "شوفي... شوفي شحال زوين... شوفي راه انسان فشكل..."... وهادشي جا غير هكاك... بلا ما نحاول... اللي حسيت بيه قلتو... كنت مآمنة به... وخا دكشي كامل، عرفت بلي راه مزيان...
وسكتت شوية، ومن بعد قلت ليها شنو كاين... قلتليها ها شنو بغا وها شنو بغيت... تصدمات حتى هي (حيت هي اكتر مني... تابعة نفس النهج... ومامتيقاش بلي ختها غادي تجي تعاود ليها شي حاجة بحال هادي شي نهار...)... هضرنا و قالت لي فالاخر : "واخا باقي كاع ما عرفتو عجبني... وما تعرفي... واش نتي غادي تبقاي ديما بايرة؟ ضروري شي نهار يجي شي واحد... المهم خليك عادي معاه... مع الوقت غادي يبان ليك شنو تديري..."
وداكشي اللي كان... وعيط لي ديك العشية، وما جاوبتوش... وحلف لي بلي مرض بسباب الفقسة... جاوبتو ديك الساعة وكانت باينة عليه بصح... قلتليه بلي صافي... حياتك هاديك وما طرا والو... وبقا كيدير واحد المجهود خطير باش يبين لي راه ما كاين والو من داكشي اللي فهمت... قال لي بلي مسح ندى وعمرو يهضر معاها حيت كرهها... قال لي نفهمو حيت حتى هو ما صدقاتش معاه ووصلات دكشي وباللي بالنسبة ليه را حنا صحابات قراب وماعندو مناش يخاف... وعاود تاني حلف لي بلي هي اللي سولاتو على شحال من حاجة وهو غير جاوب...
تافقنا نسدو هاد الموضوع ونديرو ما وقع والو... ولكن الغد ليه غادي تبان حاجة جديدة... ندى غادي تجي عندي هي وغزلان (علما أني عاد عارفتهوم على بعضياتهوم ما كاملاش شهر...) باش يشدوا فيا ويسولوني على الموضوع... فهمت بلي الهضرة وصلات... و بداو بجوج فبزاف ديال الأسئلة... "فين عرفتيه؟ ايمتا؟ شحال فعمرو؟ شنو كايدير فحياتو؟ ياك قلتي عايش معا ماماه؟ ... اجي، عندو الطوموبيل؟ واش عجبك؟ وا غير دوي دوي... ما عرفتيش فين ساكن بالضبط؟ شكون خلص؟... عنداك تكوني خلصتي شي حاجة... اشمن نيفو عندو؟ ..."
بقيت مصرفقة وكل سؤال كنردو ضحك... واش هادشي أنا وماسولتوش عليه؟ ولاش غادي نقلب على شي حوايج... ماعرفتش ولكن جاوني تافهات فديك اللحظة... وجاوني أسئلتهوم باسلة... يمكن حيت متحمسات وصافي وممتيقينش وغير كيهضرو... ويمكن بصح زادو فيه...
هادشي خلاني نتفكرو... يقدر يكون حتا هو غير تتخنق بالاسئلة... و العكس ديالي أنايا معرفش يخرج راسو... وجاوب بكل بساطة... داكشي علاش درت مجهود باش نصرط شنو طرا... وهو كان فديك المدة كايحس براسو مدين لي...
وليت كنفيق الصباح كنلقا رسائل ففايسبوك... نصوص طويلة كيقول لي فكل مرة طار عليه النعاس وتلها فيها... فهاداكشي اللي كان كيكتب، كايعبر لى شي حوايج زوينة ونقية بزاف... كنشوف فيها الاحترام والتقدير قبل من أي حاجة خرى... كانو فيها بزاف ديال التفاصيل... فيهوم كايبان لي الصدق ديالو والانتباه لأبسط الحوايج... فيهم كندوخ وبيهم كنتأثر...
وأنا كنحماق على التفاصيل....
كلشي فالتفاصيل...
ليست هناك تعليقات:
إرسال تعليق