الموقف فاش تحطيت مع بابا، خلا بزاف ديال الحوايج يزيدو يتعقدو... مانقدرش دبابا نهضر فتيليفون مع شي دري ولا نتكونيكطا معاه حيت ركب فيا الرعب، وحيت ايلا شافني غادي نفكرو فشنو وقع وغادي يقدر يقول معا راسو كاندير شي حوايج خايبة فعينيه، أولا على الأقل تافهة... وغادي تلهيني ...
أنا اللي كنت كنحلم نقنعو هو وماما بلي علاقة أخوية ممكن تكون ما بين دري وبنت، ولات كتبان لي شي حاجة صعيبة... صعيبة بزاف... ونزيد على هادشي أنه من بعد داكشي اللي طرا والطريقة باش هضر معايا نور مورا شنو وقع وقبل منو، وخصوصا الهضرة اللي قال لي صاحبو ملي أكد ليا "أنا كنعرفو مزيان... راه ماكايشوفش فيك ختو، راه غير كايحشم وماغديش يقدر يصارحك ونتي شافك فشكل وكيقول غادي تقلبي عليه..." وزاد قال لي "أنا متأكد بلي مابينكوم والو... ولكن عارف بلي فقلبو هو بعدا كاينة شي حاجة، راه صاحبي وانا كنعرفو... بلحق مايصلاحش ليك..."
هاد الجمل بالضبط شككوني فنور شوية... ولأول مرة من نهار عرفتو، غادي نبدا نسول راسي على حاجة فحال هادي... واش ممكن يكون داك التعامل الزوين معايا غير أنا؟ واش يقدر يكون كايعتابرني شي حاجة أخرى وغير كايخبي؟ واش ممكن شي نهار يصدمني بحاجة بحال هادي؟ عنداك يكون فاهم تعاملي معاه غلط؟... تلفت بزاف... ومانقدرش نجبد موضوع بحال هادا حيت كانحشم من جهة ومن جهة اخرى ماباغاش نحرج راسي ولا نحرجو ملي نبان غير كنخربق وخالقة شي حاجة ماكايناش... وتما قررت نبدا نرد بالي كتر، ونأكد كتر وكتر على أنني نعاود فكل مرة لنور بلي راه خويا...
الطيبوبة ديال نور كانت كبيرة وكافية لانني نشوف فيه انسان مزيان، ولكن معايير اخرى ماغاديش نهضر عليها احتراما ليه ولراسي (حيت غير مسألة اختيارات شخصية)، كانت بالنسبة لي ضرورية فواحد اللي غادي نشوف فيه شي حاجة اخرى من غير اخ، ما كانتش فيه... ولكن كانت فيه كاع النقاوة والظرافات اللي خلاتو يكون عزيز علي وبزاف...
داز الوقت، وتصالحت معا بابا وولا كايهضر معايا عادي أنا واختي... واخا التشاش لداخل، بلحق بردت على راسي وقلت بلي حتى أنا غلطت، اش داني نوصل هادشي ونجبد الصداع، ... درت اختيار ايوا نتحمل العواقب... (ما درت حتى شي حاجة خايبة، اه، ولكن كان خاصني شي عذر نعطيه لراسي باش نقدرنرتاح وننسى حاجة تافهة مرضاتني...)
بقات علاقتي معا نور مزيانة ولكن وليت فيها غير حاضية جنابي، تزادني وسواس جديد وخايفة من شي حاجة ما كنتش متأكدة منها وفنفس الوقت، شي حوايج كايدلو على أنها ماشي مستبعدة بزاف...
جا أبريل ديال 2012، وساليت القراية وبقا خاصني ندوز غير الستاج... بانو النتائج، الأولية وجبت معدل مزيان،... فرحت والدي وحسيت بها فرصة خلات بابا يتناسى اكتراللي فات... وليت كنقدر نكلس فالبيسي بلا مانفكر فكل مرة "شنو كايقول مع راسو؟ شنو كايتخايلني كندير؟ ...."
وفواحد العشية، وأنا فالفايسبوك، طحت على واحد الكونط صدفة...
صدفة،...
كانت صدفة...
ليست هناك تعليقات:
إرسال تعليق