ما يمكنش نقبل حاجة بحال هادي... ومايمكنش ندير بحال ادا ما واقع والو... ومايمكنش نواجهو حيت خايفة نسمع شي حاجة تمرضني... مايمكنش هادشي كامل... مايمكنش وصافي...
بدا كايسيفط ميساج من ورا واحد اخر... وانا ما فاهمة والو... تما قلتليه خاصنا نهضروا... بغيت نقول، نكتبوا... )حيت ما كنتش نقدر نتجاوب معاه فموضوع بحال هدا فالتيليفون... كنت مازال كنسكت ملي كيدوي ومازال مازاعماش عليه ومازال الحشمة الزايدة ديالي معقداني...)... تكونيكطا ديك الساعة وبدا كيهضر ما بغاش يسكت... قال لي بزاف ديال الحوايج والخلاصة أنه فهم بلي أنا "حالة خاصة"، وبلي ما باغاي مني والو... باغي غير يبقى كيدوي معايا ومنخسرش معاه... وقال لي "سمحيلي ادا حسيت بشي حاجة نتي ما قابلاهاش... ولكن شي حوايج ما كانتحكموش فيهوم، وكنواعدك هادشي غادي يتدفن فمرة وحدة..."
بقيت مصمكة وأنا كنقرا... حسيت براسي ظالماه... ولكن فنفس الوقت راني ما درت والو... انا هكدا دايرة... ماشي غير معاه... غير هو تقربت منو دغيا وبزاف... ولكن واخا هاكاك، أنا اللي خليت راسي ديما كاينة، حتى ولف... ما عرفتش شنو ندير ولا شنو نقول... شداتني البكية، ...
شداتني البكية، حيت بالنسبة لي دري بحال هدا وعايش هادشي كامل وفايت ليه تغدر واللي فقلبو وراسو كايقولها بلا ما يفكر، ما يمكنش يكون كيكذب... مايمكنش يكون كيمتل راسوا كيتعدب... مايمكنش يخرج هاد الهضرة كاملة اللي قال من لسانو بلا ما يحس بيها... داكشي اللي قال كامل عمرني سمعتوا من شي حد... عمرني عطيت لشي حد الفرصة يقولو ليا...
هضر لي على التفاصيل الصغيرة، على كاع التصرفات اللي درت معاه وبانت ليه شي حاجة، على كاع داكشي اللي بدلت فحياتو، على الأمل اللي عطيتو فكلشي... قال لي بلي حييت فيه الانسان اللي ميت فيه لداخل... قال لي " C'est seulement avec toi que je me sens humain..."... وهو كيهضر، وانا كنتقسح... ما فرحاتنيش هضرتو فمرة، غير أزماتني... حيت كاملة مغلفة بالحسرة... حسيت براسي آديتو، ... وهادا كان كافي باش نبكي... وبكيت...
دازت بزاف ديال اليام وحنا كندويو فنفس الموضوع... فكل مرة كيقول لي رجعي كيف كنتي، وفكل مرة كنحاول وماعرفاش... بزاف ديال Les conversations طوال كانتقاتل نقول ليه بلي غير ولفني، بلي جيت عمرت ليه واحد الفراغ وصافي، وبلي راه ما كايبغينيش وخاصو يفيق... وما كيعياش فكل مرة يعطيني قشلة ديال الأسباب يوريني بيها بلي غالطة... ولينا فحرب... كل واحد شنو باغي... وحتا واحد ما باغي يتنازل... اللي خلانا ما زال كانهضرو، هو ماباغينش نهرسو علاقتنا...
تكون اللي كانت... المهم كاينة شي حاجة فوق منو وفوق مني، شداتنا، خلاتنا نبقاو هنا... لجوج حوايج مختلفين، كيتلاقاو فجملة وحدة " ما بغيتش نخسرك..."
ليست هناك تعليقات:
إرسال تعليق