هاديك الصدفة ماكنتش عارفاها شنو مخبيا لي... كلشي بدا غير بتصويرة وكمونطير...
كان واحد الدري داير شي تصويرة، وجا واحد من صحابو ودار ليه تعليق كيضحك، وفنفس الوقت، بالأسلوب الزوين باش مكتوب، كايبين بلي اللي كاتبو ماشي شي واحد تافه فعقلو... ديك الساعة دخلت للبروفيل ديالو... أول حاجة غادي تبان لي، هي التصاور اللي كاملين دايرين على les jeux videos, و العزلة... كانو بزاف ديال التصاور محطوطين وكايبان بلي هو اللي دار ليهوم مونتاج، وكايسينيهوم باسم مستعار متبوع بجملة Forever Alone... بروفيل مفرنس يامتياز وكايعطي انطباع على أن مولاه شي واحد ناضج... وحيد، وما حشمانش من أنو يقولها بحال ادا كايغوت "هكدا بغيت نكون"... شميت ريحة الألم فهاداك الشخص، وشفت من وراه شخصية قوية... (على الأقل هادشي اللي بان لي...)
هو غير بروفايل من بين بزاف... ولكن فديك اللحظة مابانش لي هاكداك... شي حاجة زعزعت الفضول ديالي فيه، وبغيت نعرف شنو من وراه... ماكانت حتى شي صورة شخصية فيه وماكانش كيهمني نتخايل وجه داك الشخص بقدر ما باغا نعرف ملامح شخصيتو... ما عرفتش، شي حاجة جراتني وخلاتني ندوز وقت طويل وانا كنقلب وكنقرا شنو فيه... وفالاخير، صيفطت invitation... كانت آخر حاجة كنفكر فيها هي نتعرف عليه (حيت ماكنعتبرش فايسبوك وسيلة للتعارف بقدر مادايراه باش نهضر معا ناس كنعرفهوم من قبل ولا نتتبع ناس اخرين نقدر نتعلم منهم شي حاجة...)
وهكذا بغيت نتتبع هاد الشخص وصافي، نشوفو من بعيد... واقيلا لقيت فيه واحد الجانب من شنو مخبي فيا، هو قادر يعبر عليه ويبينو... بحال ايلا نطق بشي حاجة ماعرفتش نقولها، وملي سمتها مننو قلت اه، هي هادي... تماما... بصح...
ولكن وخا هادشي كامل، مادرتش معاه بالي بزاف... عادي، قبل ولا ماقبلش، ماشي مهم... ملي وصلني القبول بليل، نسيت كاع واش صيفطت... وهضر معايا ديك الساعة...
ما جاوبتوشو وتجاهلت الميساج حيت كيف قلت، ماباغياش نتعارف... وعاود صيفط ميساج اخر مسولني فيه واش كنعرفو بعضياتنا (نسيت ما قلت بلي ملي دخلت للبروفيل ديالو شفت بلي عدد الاصدقاء صغير بزاف...) ... تما جاوبت باش نقولو لا، وقال لي شكون نتي وعرف لي راسو بزربة قبل ما ندوي، ... حيت شافني تعطلت اقيلة وفهم بلي ماباغاش ولا مامسالياش نجمع معاه...
قال لي بلي فعمرو 23 عام، كيسكن فكازا وخدام infographiste; (تما تأكدت بلي هو اللي داير دوك المونتاجات للتصاور)، وقال لي بلي كايبغي les jeux videos et les animes, ويتهلا فماماه... كانت أول مرة كنسمع شي واحد يعرف راسو بحاجة بحال هاكدا... شي حاجة مختلفة، وزوينة... وحيت الاختلاف كيغريني ديما، قررت نجاوبو... واخا ماكانش الجواب هو الغاية، ولكن كان السبة باش يكون عندي الحق فالتسوال... قلت ليه سميتي والمدينة فين كانسكن... وديك الساعة قلبت نستفزو باش يدوي على شنو بغيت نعرف "هادي أول مرة كانشوف شي واحد ماكايحشمش يبان Forever alone.. ولا مفتخر بيها كاع "... وتما جاوبني وقال لي "كنفضل بزاف نكون Forever alone, على انني نكون مع ناس فعلاقات ما صالحة لوالو ولا خايبة..." قلتليه مزيان وبينت ليه بلي عجبني هاد التصور وسكتت.
موراها قال لي ما كنقبلش الناس اللي ماكانعرفش، ولكن نتي قبلتك وماعرفتش علاش... واقيلا على ديك السمية اللي دايرة (وضحك)... ضحكت وأنا كنقول مع راسي (صافي باين غادي يبدا يبلبل عليا بديك الهضرة الخاوية ديال ارتاحيت ليك من المرة الاولى... وتفقست علاش صيفطت كاع شي انفيتاسيون)... وداكشي اللي طرا، قال لي راني ماعرافش كاع لاش كنهضر معاك بهاد الطريقة... راني بصح مادايرش هاكا مع الناس الاخرين...
تما، حسيت براسي غير تقولبت فدوك الامطباعات ديال والو، وقلت خلي من بعد ونجي نمسحو عليا من هنا... وبقا كايدوي موراها شوية وماجاوبتوش... والغد ليه، مامسحتوش... ماديتهاش فيه وصافي وماعمرتش بيه راسي...
بديت الستاج ديالي الغد ليه... وكنت انا والسيدة اللي معاها فالبوسط، كانخدمو وكانتكونيكطاو وكانضحكو وكانتعاودو (كانت ظريفة ودغيا تفاهمنا...)
مورا هادشي بشي يومين أو تلت يام، غادي نبارتاجي واحد المقالة كتهضر على واحد الدراسة كتهم المغاربة وعلاقتهم بشي حوايج ومن ضمنهم الجنس... وغادي يجي هو ويدير واحد التعليق بعقلو وفيه معلومات بزاف، غادي نجاوبو ومن وراها غادي يقول لي فالخاص بلي خصني نرد بالي من البارتاج ديال حوايج بحال هادي، تقدر تجبد علي ضسارة ديال وحدين كاياخدو غير القشور ديال الموضوع وكيشدو فالنقط التافهة... شكرتو وفهمتو بلي عارفة كيفاش نتعامل ومعا من كنتعامل... ودخلنا فحوار طويل وغارق... هضرنا على الناس، كيفاش كيفهمو غلط، علاش سوء الظن ساهل، على الحشمة اللي قال خارجة عليه فحياتو الواقعية وعلى العزلة اللي داير راسو فيها... وهو كيهضر، وأنا كتتزاد عندي الرغبة نعرف كتر وكتر... عرفت بلي موراه كاينة شي قصة كبيرة... وحدة من دوك القصص اللي كايخليو حياة الانسان ماشي بحا الاخرين... وواقيلا عاق بيا تشوقت نكتشفها... شكرني بزاف على الوقت اللي عطيتو، وقال لي "نقدر نعاود ليك شي نهار..."
وهاد الجملة ربطاتني، خلاتني باغية نعرف شنو هادشي اللي يقدر يقول لي، علاش كيبان مختلف وهاز شي حاجة كبيرة من وراه... وبقيت كانتسنى...
العشية هضر معايا (بحال ادا بغا يتأكد بلي غادي نولي نجاوبو...)، سولني واش لاباس وملي سواتو وبدا كيلمح لي بلي عندو شي مشكل فالخدمة... عاود لي بلي اللي مسؤول عليه ماكيخليش ليه فرصة يبين شنو عندو ولايخدم على شي حوايج اللي مهمين بالنسبة ليه، باش يزيد يتعلم... وقال لي بلي شحال وهو كايعاني من الصداع فهاد الخدمة، وبلي قرر الغد ليه يهضر مع المدير... تمنيت ليه يدوز كلشي بخير ومشيت فحالي ننعس...
الغد ليه، غادي نسول فيه (وغادي تكون اول مرة نجبدو أنا...)... خليت ليه ميساج قلتليه بلي كنتمنى تكون حليتي المشكل وكلشي داز مزيان... وملي جا وجاوبني، بقا كيشكر في بزاف... كايشكر في بحال ادا انا اللي حليت ليه المشكل بديك الجملة ديالي... من بعد فهمت بلي ما عولش عليا نفكر ليه ولا نتفكرو ونسول شنو دار واخا يالاه يامات وشي مرات قلال باش هضرنا... كانت بالنسبة لي شي حاجة عادية، ولكن بالنسبة ليه لا... فهمت من بعد ملي فسر لي بلي ما كايعرفش ناس بزاف وبلي ماكاينش اللي يشاركو لا داكشي مناش كيخاف ولا اللي كيفرحو... عرفتو بصح Forever Alone...
و واقيلا، شفقت عليه...
وهادشي اللي خلاني ندير شنو درت...
ليست هناك تعليقات:
إرسال تعليق