مقدمة - كيفاش وصلت هنا...

كلنا عندنا أسرار... 

سواء كانو دياولنا وكايخصونا حنا، أولا ديال ناس خرين تشاركوهوم معانا...

أسرار كبار ولا صغار... مخبيينهوم من سنوات ولا غير يامات قلال...

من دوك الأسرار اللي كيثقلو علينا حتى يخنقونا... 

ولا دوك اللي كايبانو لينا تافهين ومخبيينهوم غير حيت نسينا ولا وصاونا نخبيوهوم...

كلنا عندنا شي حوايج عارفينهوم غير حنا...

كانتمناو نتقاسموهوم شي نهار مع شي حد ولا كانتقاتلو ندفنوهوم باش عمرهوم يخرجو...

حوايج اللي عشناهوم ولا شفناهوم ولا تعاودو لينا...

واللي يقدروا يوليو فلحظة، أهم حاجة فحياتنا...

ولا يكونوا هوما حياتنا كاملة...

حيت عليهوم كتدور وبيهوم كتستمر...

بحال السر اللي خلاني نكون هنا اليوم...

فالحقيقية، هوما بزاف ديال الحاجات اللي وقعوا وخلاو حياتي كاملة تتبدل...

خلاوني نولي شي حاجة أخرى...

ماعرفتهاش شنو كتدير لي ولا كيفاش كتردني...

 وماعرفتش فين غادي توصلني...

اللي عارفة هو أنني عشت جزء من حياتي فشي شكل...

هو اللي وصلني هنا...