فقت الصباح... مازال ما كاين والو...
داز النهار كامل... ومازال ما بانش...
عيطات لي زينب... قالتلي واش عيط ليك... قلتليها لا... وتصدمات...
عرفتها هضرت معاه...
قطعات معايا... فالعشية عاود عيط ..."كيبقيتي؟ لاباس لاباس... ياكما نجي؟" ... "لا، لا... ماكاين لاش"... "وكوني قوية..." ... جاوبتو ب "واخا، شكرا... انت لاباس؟" ... "لاباس... شكرا... نخليك دابا"...
ومشا... وفهمت بلي ماعيطش غير هاكاك... بلي حتى فكروه... وجاني كون ماعيطش حسن... وكون ماجاوبتش حسن كتر... ولكن كان خاصني نعرف واش عندو شي حاجة... واش واقع شي مشكل حيت واخا هكاك تشوشت...
جا النهار الرابع وعيط لي... فهم بلي مقلقة... صارحتو نيشان "ماكنتش كانتوقع مانلقاكش دبا... كون كنت بلاصتك، كون كنت كنتسنا نهار اللي تقول فيه غير "اي"... باش نبين ليك راني حتى أنا كندير شي حاجة على ودك..."
تعصب وماقبلهاش "راني مريض... را عندي Depression... را كنشرب دوا كينعس... راني مريض... ورا الشهر سالا ومخلصتش هاد الشهر داك l'abonnement..."
"مايمكنش ماتلقاش درهم واحد... ومايمكنش تكون كتنعس 24 ساعة... وحتى دابا ماطرا والو... نخليك دبا، بسلامة"... وحتى هو كان باغي يقطع... وماحاولش يشدني "بسلامة".
عيطت ليه الغد ليه... تفكرت الهضرة ديال ماعنديش الفلوس... شنو داير دبا؟ شنو كايصرف؟ ... الخدمة؟ شنو دار معاهوم مورا ديك التغييبة اللي ضرب؟ ومور هاد Les certificats فكل مرة؟... وليت هازة الهم تاني... قال لي بلي صاحبو مسلفو الفلوس وبلي ديك الخدمة غادي يخرج منها غادي يخرج... غير مسألة وقت... وبلي را ماغاديش يدوزو ليه داكشي كامل...
حاولت نفهمو... حاولت ندير مجهود... لقيت راسي حتى فالوقت اللي انا محتاجة اللي يوقف معايا... خاصني نوقف معاه... وبديت كنشوف فراسي... "مالكي وليتي هاكا؟" ... "ماشي انت هادي... فيقي..."
عمرني تسنيت شي حاجة من شي حد... ولكن هو... ديما عاقدة عليه آمال وملصقة وراه انتظارات... وغالبا كنتخذل...
دازو يامات قلال.. باردين... كل واحد عايش الكآبة بطريقتو...
هاد المرة قررت... ماكاين لاش نضيعو وقتنا وطاقتنا بجوج...
ورجع تاني "مايمكنش تقرري بوحدك... حنا جوج"
عرفت بلي خرج من الخدمة وبلي ولا شوماج...
مشيت كنقلب على des annonces... وبديت كنسول... وخا ماعرفاش شنو كايميتريزي وشنو ماشادش مزيان...
صيفطت ليه داكشي كامل... دار بحال ادا ما شاف والو... ماقال حتى "شكرا"...
كنت كنحس معاه بزاف بهاد الاحساس... "بلي غير كنخربق..."
وعبر لي عليه شحال من مرة ب "راك مافاهمة والو"...
ملي مافاهماش... شنو كندير هنا؟
أنا على الأقل، كنحاول نفهم...
بقينا بحال المش والفار... ما بين الطليب والغوات والدموع... مابقيتش كنجاوبو... كنشوف فالتيليفون كيصوني وكنبكي ونا ماقدراش ... مابغيتش نخسرو... كنتعدب حيت غادي نبعد عليه... كنتعدب كتر منو... ولكن لمصلحتو خاصني نخليه...
وسالينا... بغيت نوريه بلي سالينا...كنت مازال واتقة بلي غادي تدوز مدة، وغادي يرجع لحياتي...كنقول بلي غادي نولفو شوية البعد... باش نرجعو نهضرو كيف الناس... علاقة محدودة.. وماكتضر حتى واحد فينا...
ماكنتش باغاه يمشي فمرة...
آه، ولفتو...
ليست هناك تعليقات:
إرسال تعليق