صاحبتي "الكآبة" مانساتنيش تاني...
نفس الاحساس بدا كيلعب بقلبي... والأفكار ديال ديما بانت ...
تقبلت فالماستر... كانت فرصة نقنع راسي بلي بديت صفحة خرى ونخلي اللي فات مورايا ... رجعت كنوقف طموحاتي على رجليها وكنسطر أهداف اخرى... وكنقول لراسي بلي المستقبل "ماعرفتش شنو مخبي ليا"... "عشت تجربة وسالات... دبا غادي نبدا حاجة خرى وغادي نقلب على راسي... على ديك البنت اللي كنت واللي توحشتها..."
بديت هاد الفصل الجديد بشكل عادي... حاولت نلهي راسي بزاف فالقراية... كانت الحاجة الوحيدة اللي بقات ليا... حتى ندى مشات... و حتى الدراري ما بقيتش كنقبل نتعامل معاهوم فحدود ديك "الصداقة" اللي لحد الآن جبدات لي بزاف ديال المشاكل... لقيت راسي بوحدي... وحتى نور غبر عليا... غبر بواحد الشكل كايدخل الشك...
وفواحد النهار، غادي يدخل واحد التصويرة ففايسبوك... وكومونطيتها ليه، بلا مانهضر معاه فالخاص... الغد ليه جاوبني وصيفط لي موراها ميساج،... كان 23 فبراير 2014... قال لي "آهيااااااااتا"... بحال ادا كيعيط ليا...
كان الغد ليه عندي امتحان نهائي فواحد المادة... وكنت مقلقة بزاف على شي حاجة ماعرفاهاش... ودكونيكطيت بلا ما نجاوب...
قلت هاكدا بالحرف، مع راسي "عرفتي، شحال هادي ما هضرت معا نور... خاصني معاه شي جلسة طويلة... مانجاوبوش دبا حيت غادي يخصني نعصر هنا وغادي نتفقس ادا بديت معاه الكونفيرساسيون وتقعدت دغيا... وغدا تابعني داكشي... أوف، حسن نحيدو عليا ونتهنا باش غدا نجلس على خاطري..."
ومشيت نراجع زعما... وماقدرتش نقرا... ما ركزت حتى شي دقيقة... كان بالي مشغول فوق القياس... وماكنفكر فحتى شي حاجة باينة... بحال ادا ساهية وبحال ادا مرفوعة... وحسيت بقلبي مقبوط... ماكنتش كنعرف شنو المعنى ديال هاد الجملة... اللي عارفاه هو فديك اللحظة، جاني راسي بحال ادا مريضة بزاف، وشي حاجة تقيلة محطوطة على قلبي... كيضرني وماكايضرنيش... شي حاجة كتقرصني فيه لداخل بزاف،حتى كيبان لي بحال ادا غير كنتخايل... بلي الألم فعقلي وماشي فقلبي... وكنحس بيه تاني كيتعصر... كيتعصر بالزربة حتى كنقول راه داب وداع فالعروق وعاود تصاوب من جديد... حسيت براسي محتاجة نقول "قلبي مقبوط"... وحطيت عليه يدي... بحال ادا كنقول ليه "أنا هنا... معاك أراسي... ادا مشا كلشي غادي نبقا معاك... بشوية عليك أقلبي... كرفستك بزاف... ولا كرفستيني... غير قول لي مالك... شنو كيضرك راني مفهمتكش..."
كانت يالاه التمنية، وقلت غادي ننوض ننعس... يقدر يكون ستريس وصافي... وحطيت راسي ففراشي وطرت بعقلي لجهة اخرى... وتفكرت نور... واقيلا الضمير ديالي بغا يفيق عليا حتى هو... ولكن ماقاداش اليوما... مكرهتش نطلبو ونبكي "خليني نرتاح اليوم راني عيانة..."... والعجب، ما بكيتش... ما هبطات حتى دمعة باش نرتاح...
نور عاوتاني... مالي معاه؟ علاش اليوما تفكرتو بزاف؟... توحشتو؟... كون توحشتو بصح كون دويت معاه قبل ما يدوي معايا... أنا أصلا قررت نبعد عليه حيت ما كنعرفش بحق العشرة... قلبو كبير بزاف على أنه يحتوي وحدة بحالي... بيض لواحد الدرجة ماتجيش معايا أنا واللي بحالي...
ما عمرني ماننسا حتى نموت، داكشي اللي قلت فنفسي ديك اللحظة: " الصراحة، أنا مامزياناش... ديما كان كيسول فيا ويجي يقلب عليا ادا غبرت...هو الانسان الوحيد فحياتي كاملة، اللي عمرو خلا ليا كلمة جرحني بيها... واخا نعيا مانتفكر، ما كاين حتى شي حاجة ولو صغيرة آداني بيها... نور ما كاينش بحالو، ومايستاهلش يعرف وحدة بحالي... وراه الخوت وكيقدر; يغلطو فيك بشي كلمة كتقيدها وماكتقدرش تمحيها... هو، راه بصراحة حالة خاصة... ماشي بحال البشر لاخر..."
ونعست ديك الليلة، من مور بزاف ديال les monologues... وفقت الصباح، وأول حاجة درتها قبل ما نخرج لللافاك، حليت الفايسبوك وجاوبتو على الميساج "هاي، هاي... شفتك بدلتي التصويرة وضسرتي... لا باس عليك؟... " على أساس يجاوبني ونتفاهم معاه ندويو العشية... ماكانش كونيكطي، وكان خصني نمشي... وداكشي اللي درت...
فالعشية، كيف حليت، طلعو لي بزاف ديال Les notifications عندهوم علاقة بتصويرتو... فكل مرة كتطلع لي وحدة جديدة من بزاف ديال الناس حتى شككوني... ملي حليت... غادي نندم علاش وصلت تما...
"الله يرحمك أ نور..." "نور مات... دعيو معاه"...
شنو؟ شنو كايقولو هادو؟ شنو هاد الضحك الباسل؟ آش هاد التخربيق؟ واش هادو معندهوم مايدار؟ ... سعرت... كانت أول حاجة هي السعرة... ماشي الخوف، ماشي التقليقة... حيت هادشي مكيدخلش للعقل... واه، يلاه البارح دوا معايا... يالاه الصباح صيفطت ليه ميساج...
بديت كنعيط ليه... ما كايجاوبش... دخلت للmur ديالو، نفس الهضرة كتتعاود ودوك الدعوات مكتوبين شي عشرة ديال المرات... لا،لا... مافيهاش... هادو اتافقو باش يديرو تمثيلية باسلة... ولكن انا را طلعو لي الدم... ما عنديش مع هادشي...
بديت كنصيفط فالميساجات لكاع هادوك اللي كيبانو ليا... كنكوبي ونكولي بحال شي حمقة... وكولهوم نفس الجواب... وبزاف ديال الحزن وemoticones ديال البكا...
البارح طفا الضو... البارح مشا النور... مشا بالسكات... كيف كان ديما... ماكيبغيش يتير الانتباه وما كيقلبش يكون تحت الأضواء، حيت هو الضو... طلع للسما بوحدو... ما كان معاه حتى شي واحد يسمع منو وصية... يقطر ليه الما... يشد ليه فيديه باش مايخافش... ولا يدوز يديه على جبهتو ويمسح العرق اللي غادي يكون على جبهتو ملي تبدا تبان روحو... بلا مايشوف واليديه كايبكيو ولا يسمع خوتو كيشهقو... بلا مايكون فسرير ودايرين به... بلا مايعيش دوك الاجواء اللي كتكون فبحال هاد اللحظات... طفا بلا ما يحس بيه شي حد... وعلى غفلة... ماشي بحال الأغلبية... حيت هو ماشي منهوم...
مشا وبانت بلاصتو... حيت الضو هكدا... كتبان قيمتو فالظلام... كنتفتنو بشنو قدامنا، وكنغفلو على شنو فوقنا... ملي كنخليو شي حاجة وكنرجعو ونلقاوها بلاصتها، كيتساحبلينا غادي تبقا لينا ديما... كنتبعو الحياة وكننساو الموت.. كنقولو معا راسنا بلي دوك القصص الغريبة كتوقع غير للاخرين وبلي أقدارنا ديما بسيطة... ما كنقولوش مرة مرة بلي نقدرو نكونو حنا الاستثناء...
مشا نور... قبل شهرين على عيد ميلادو 23... مشا صغير... بلا مايكون مريض، ما كاكيتشكى من حتى شي حاجة... ما ضرو والو من غير قدر كتب عليه يتخطف من فوق الارض لبلاصة خرى... آه، تخطف... تخطف وكان كيبان بلي رجع لشي قنت كينتمي ليه... الوجود ديالو لهيه جا معاه كتر... هاكا كيقول لي قلبي... مازال ملي كنشوف فالسما كنتخايلو ضاحك الضحكة ديالو اللي مغروزة فتعاملاتو قبل قلبو... ماشي ضاحك معايا... لا، عمرني تخايلتو ضاحك معايا وخا تخايلتو شحال من مرة مقلق مني... كايبان لي ضاحك فوجه الدنيا... بحال ادا كيقول راني خديت ما حسن...أنا فرحان هنا...
مازال كنشوفو ملي كتكون السما زرقة وصافية وكتكون الصفورية ديال الشمس عاطية ولكن خفيفة... ما كتعميش... بحال ادا خارجة منو... دافية بحالو... وزوينة بحال نفسو...
لا،... لا،لا،لا... ماكنقولش هادشي حيت ملي كيموتو الناس كنصوروهوم بحال الملائكة... كانبقاو نشكروهوم فوق القياس حيت متأترين بفراقهوم... لا... كان هكدا... كان عندو عيوب أكيد، ولكن كيعرف يبدلها ولا يقمعها... كان كيبعد من كل شخص ولاموقف يقدر يخلي الجانب الخايب فيه يبان... كان كيفضل "التيقار"...
مشا نور... وبقيت انا... وبقاو بزاف ديال الناس كيهضرو عليه... خلانا بحال شي أب خرج من الدار ومارجعش... حسينا براسنا ضعاف ويتامى... حطينا الراس على الراس... ولا شي كيدوي معا شي... كلا كيصبر لاخر...
وتما غادي نكتشف بلي ماكانش منور غير حياتي أنا... كنت غالطة فيه... ماشي بوحدي اللي كان كيسبقني للخير... كان ما كايتحاسب مع حتى شي حد... لقيت دكشي اللي كنت كنشوف فيه، شافو فيه كلشي...
خاصني نعترف بلي تبلوكيت... بلي هادا أكتر جزء تعطلت فيه وماعرفتش كيفاش نعبر... ما غاديش نزيد نهضر عليه... غادي ندوي عليكوم... ولا نقول ليكوم...
لكاع اللي كيقرا...
يقدر يكون فحياتك نور، يقدر عاد يبان،... ويقدر عمرو يجي حيت نتا مكتاب عليك تكون هو النور فحياة ناس خرين... ما يمكنش كلشي يكون نور... باش الحياة تدور وتستمر خاص يكون شوية من الخايب والزوين... خاص ناس تكون كتشد فقلبها وناس كتنسا دغيا... ناس كتعطي كلشي وناس هنا غير باش تاخد... ناس كتنسى راسها قدام كلشي وناس أنانيتها ما كاتساليش...
ماشي عيب ماتكونش نور... غير ماتكونش العكس وتآدي... ماشي حشومة ادا ما كنتيهاش فالماضي... المهم هو اليوم، تحاول... تقاتل ضد الظلام اللي فيك لداخل وماتخليهش يغلب عليك...
ملي تغيب ويتوحشوك الناس... تبعد ويتبعوك... تنساهوم ويتفكروك... ماتكونش حاضر ويجبدوك بالخير... يغوتو وهوما كيقولو بلي محتاجينك... بلي حياتهوم بلا بيك كتتبدل... هادشي كامل زوين... زوين بزاف... وماكايجيش غير هكداك، خاصك تدير علاش... تكون نور...
نور، هضر معايا قبل مايطفا وماجاوبتوش... قلت حتى لغدا وماجاش داك غدا... هاداك أول درس، الوقت ماكيتسناناش... ماكايمشيش على هوانا... تابع الريتم ديالو ومامسوقش لينا... ما كيوقفش على ودنا باش نعيشو واحد اللحظة كيف تمنينا... وماكيتسناناش حتى نفيقو باش نديرو شي حاجة مشا عليها الحال... وماكيزربش، ما كيزربش ملي كنبغيوه يدوز دغيا...
نور، مور ماسيفط لي الميساج طفا... وهاديك التعييطة ديالو بحال ادا كان باغي يهضر معايا للمرة اللخرى... هاداك درس آخر... خاص ديما نعطيو وقت لأي حاجة... مانغفلوش على الناس اللي كنلقاوهوم ديما حدانا، وخا يكون عندنا اللي كان... باقي كنتأزم فكل لحظة ملي كنقول بلي "ما سمعتوش..."... ولكن مانكدبش على راسي... فين كنت قبل؟ ... الغلط ديالي... وهاداك كان العقاب... ونستحقو...
نور، كان مكيحشمش من أنو ياخد المبادرة ويرجع مور الخصام... وكان كايديرها بعزة، بلا ما يهين راسو... وهدي حاجة اخرى... فكل مرة كيدير معانا شي واحد شي حاجة زوينة وخا نكونو حنا لغالطين، راه كيكبار هو... ونقدرو نصغارو حنا...
نور، خلا لي بزاف ديال العبر فحياتي... وتعلمت منو ملي مشا،كتر من داكشي اللي تعلمتو ملي كان هنا... حيت هادا حتى هو درس: نحلو عينينا على الحاجة ملي كاتكون قدامنا... ما نبقاوش حتى يفوت الفوت...
ما تخليوش الضو يطفا...
فيكوم...
ولا حداكوم...
نور، خلا لي بزاف ديال العبر فحياتي... وتعلمت منو ملي مشا،كتر من داكشي اللي تعلمتو ملي كان هنا... حيت هادا حتى هو درس: نحلو عينينا على الحاجة ملي كاتكون قدامنا... ما نبقاوش حتى يفوت الفوت...
ما تخليوش الضو يطفا...
فيكوم...
ولا حداكوم...
سلام عايشة ولفتك ... تك تك. بغيت نقول ولفناك. و الله هادي أول مرة كنقرا شي حاجة أو كان نطول فيها او فنفس الوقت عايش معاها... كن نتأمل, كن نحلل, كن نشرح, كن نبرر, كنتأثر, كنضحك, كن نستافد, كناقش, كنستخلص, كن نكتب. مهم الفكرة او لا الغاية لي جيتي بها هنا. مبدعة أو ناجحة. علاش ؟ يمكن طرحي هاد سؤال على راسك. بكل بساطة وافقتي شرط الاساسي ديال تأليف أو كتابة رواية((قصة)) لي بغيتي تسميها ... ألا هو تمرير رسائل, تجارب أو عبر للقارئ. ألمراد الكبير كايبقا فتوعية او تغيير الشخص. هن نكتب شي نقط اخرين لي عطاو الرواية قيمة كبيرة
ردحذف• رواية مكتوبة بدارجة
• واقع شباب خصوصا طلبة
• جو الاسرة المغربية
• العلاقات الاجتماعية
• ظواهر المجتمع
ما عرفتش علاش ولكين حسيت بحال الا متعلق بهادشي لي كتبتيه. يمكن بحيت أحد شخصيات رواية كي شبهلي شوية, فسلوك فتصرفات ... مهم هن نعطي رأي ديالي و لمحكمتكم الموقرة واسع النظر.
♦ ثار انتباه ديالي واحد الكلمة كتبتيها فلول "الكآبة". مزيان, كاين فرق مابين الحزن أو هاد الاكتئاب او غادي نعطيك الأدلة مع شرح. الحزن واحد الاحساس لي جد عادي كل انسان كاي يجيه الا انه ما كاي طولش بحال الاكتآب. الحزن الاسباب ديالو كاتكون باينة مثلا موت أحد الأقارب أو الأصدقاء, عدم بلوغ هدف معين ... أما الاكتآب راه كاتكون مابيك ماعليك كاي ينزل عليك. الا بغيتي تعمقي هاهوا واحد المقال مفصل (( http://www.alyaum.com/article/1031588 ))
♦ كنتي واحد لمرا فرواية شرتي ان هاد فترة لي سميتها كآبة هي مؤقتة او هدا دليل فحد داتو انه غير حزن بسبب شي حدث. تاني دليل هادشي ما أترش على الدراسة ديالك او علاقتك معا العائلة.
♦ أنا نقولك علاش, علاش كاتجيك ديك الحالة. حسب الفهم ديالي. من البداية القصة تال دابا. لحتي بزاف ديال الاعترافات.
- تضاهر و كبت المشاعر داخل النفس (( طلقيها تسرح شوية ))
- الاهتمام زائد فشي ناس (( إذا زاد الشيء عن حده انقلب الى ضده ))
- الهدف ديالك انك تلقاي دري او تعيشي معاه الصداقة او الأخوة. كل مرة كاي صدموك بنية أو شوفة خاطئة.
- موت نور(( الله يرحمو او يجعلو من أهل الفردوس )) لي كنتي كا تشوفي فيه "مثال صداقة, الأخوة الحقيقية" واخا كان واحد الشك فشي وقت.
♠ و اخيرا كن نقولك انك مازالة نفس البنت لي كنتي فلول. بحيث المبادئ و هي أهم حاجة ما تبدلوش.
♠ الانسان ضعيف كل مرة كاي يخطئ. ولكين الانسان القوي هو لي كاي يكمل طريقو بلا ما دوك الاخطائ يحطموه.
♠ شكرا بزاف تعلمنا منك
سلام يوسف...
ردحذفكنشكرك... رك،رك،رك... ههه على التفاعل ديالك بعدا، وعلى الوقت اللي عطيتي باش تقراها وتعيش معاها كيف قلت... كنتمنى تلقا فيها شي حاجة ولو صغيرة، تقدر تنفعك ولا تبدل النظرة ديالك ولا التعامل مع شي حوايج...
هاداكشي اللي قلتي كامل ممكن يكون بصح السر فأنها خلات ناس خرين (نفس الشي، مامولفينش يقراو بالدارجة)، يتبعوها... وبلا شك، بالنسبة ليك، غادي يكون الحافز رقم 1، هو انك لقيتي راسك فوحدة من الشخصيات...
بالنسبة للملاحات ديالك:
شكرا على التوضيح وعلى الرابط... كيف قلت، كانت هاديك فترة كآبة اكتر من حزن، حيت فاللول ماكيكونوش عندي أسباب فعلية ومنطقية باش نتقلق (هادشي عرفت السبب ديالو من بعد وغادي نفصلو فجزء من الأجزاء الباقية)
كان كيخليني نحس براسي مخنوقة وعلى سبة، وكان كيخلق لي مشاكل مع كولشي... غير حيت من طبيعتي كنقمع المشاعر وكنتظاهلا بالضحكة، كنقدر ندير مجهود واحد الشوية، وغير كنكون بوحدي، كتخرج مني ههه
الدراسة ما كتتأترش بمرة، بالعكس... كانت كتكون هي ديك المساحة فاش كنبرد على راسي وكننسى شوية...
هاداك التفسير اللي حطيتي والأسباب اللي خرجتي، ما غاديش ننكر بلي كنحس بيهوم بصح هوما اللي كيخليوني ندخل فهاد الحالة، زيادة على شي حوايج خرا...
متفقة معك، المبادئ هوما اللي كيحكمو، ولحد الجزء 33 (الاخير اللي تنشر الحد الآن) باقيين نسبيا هوما هوما... غادي نحكمو على الباقي من بعد باش نشوفو واش تبدلت بصح ولا لا...
حتى أنا تعلمت منكوم...
شكرا مرة اخرى.
بقا فيا بزااااف فاش مات نوووور !!! ناري قلبي كيضرني و ما فيا اللي يبكي. خصوصا فاش دوا معاك و ماجاوبتيهش ماعرفتش كيفاش دوزتي هدوك الايام واقيلة تعدبتي فيهم بزااف. انا كنت كانتمنى فالقصة انك تبقى مع نور فالاخير و لكن قدر الله و ما شاء فعل.
ردحذفبالنسبة ل( ويلي نسييت سميتو ) boyfriend كانت عندي تقريبا نفس القصة و لكن عمرنا التقينا. كنت كلشي بالنسبة ليه بحكم انه حتى هو كانو عندو مشاكل بزاااف و كنت بحال الدواء بالنسبة ليه. كنت ف ديك الفترة فالاعدادي و لكن ملي حليت عيني على ولاد اخرين تلهيت عليه و هادشي ماعرفتش العواقب ديالو حتى داز شحاال. تخليت عليه فالوقت اللي كان عمرو يفكرني نديرها و للأسف ولا مبلي بالكارو و الحشيش و جراو علي واليديه و حتى هو نفس الحلة ديال your boyfriend. باع حتى هو الحاسوب ديالو المهم ملي دويت معاه من ورا 3سنوات قال ليا نتي دمرتيني و تبدلتي بزاااف و من تما مبقيتش كانقض ندوي معاه كانشوف غير الصور ديالو فانستغرام. كنحاول مرة مرة ندوي معاه و لكن كايجاوبني على قد سؤالي و صافي.
المهم حتى كبرت و انا ف عمري 20 سنة دبا. عاد ندمت انني ضيعت الحب ديالو النقي و البريئ ليا اللي ما كنتش فاهماه و عاطياه قيمة. النتيجة اللي خلاتني نتخلى عليه ف أول لقاء ليا مع ولاد جداد للأسف
بقا فيا بزااااف فاش مات نوووور !!! ناري قلبي كيضرني و ما فيا اللي يبكي. خصوصا فاش دوا معاك و ماجاوبتيهش ماعرفتش كيفاش دوزتي هدوك الايام واقيلة تعدبتي فيهم بزااف. انا كنت كانتمنى فالقصة انك تبقى مع نور فالاخير و لكن قدر الله و ما شاء فعل.
ردحذفبالنسبة ل( ويلي نسييت سميتو ) boyfriend كانت عندي تقريبا نفس القصة و لكن عمرنا التقينا. كنت كلشي بالنسبة ليه بحكم انه حتى هو كانو عندو مشاكل بزاااف و كنت بحال الدواء بالنسبة ليه. كنت ف ديك الفترة فالاعدادي و لكن ملي حليت عيني على ولاد اخرين تلهيت عليه و هادشي ماعرفتش العواقب ديالو حتى داز شحاال. تخليت عليه فالوقت اللي كان عمرو يفكرني نديرها و للأسف ولا مبلي بالكارو و الحشيش و جراو علي واليديه و حتى هو نفس الحلة ديال your boyfriend. باع حتى هو الحاسوب ديالو المهم ملي دويت معاه من ورا 3سنوات قال ليا نتي دمرتيني و تبدلتي بزاااف و من تما مبقيتش كانقض ندوي معاه كانشوف غير الصور ديالو فانستغرام. كنحاول مرة مرة ندوي معاه و لكن كايجاوبني على قد سؤالي و صافي.
المهم حتى كبرت و انا ف عمري 20 سنة دبا. عاد ندمت انني ضيعت الحب ديالو النقي و البريئ ليا اللي ما كنتش فاهماه و عاطياه قيمة. النتيجة اللي خلاتني نتخلى عليه ف أول لقاء ليا مع ولاد جداد للأسف
بقا فيا بزااااف فاش مات نوووور !!! ناري قلبي كيضرني و ما فيا اللي يبكي. خصوصا فاش دوا معاك و ماجاوبتيهش ماعرفتش كيفاش دوزتي هدوك الايام واقيلة تعدبتي فيهم بزااف. انا كنت كانتمنى فالقصة انك تبقى مع نور فالاخير و لكن قدر الله و ما شاء فعل.
ردحذفبالنسبة ل( ويلي نسييت سميتو ) boyfriend كانت عندي تقريبا نفس القصة و لكن عمرنا التقينا. كنت كلشي بالنسبة ليه بحكم انه حتى هو كانو عندو مشاكل بزاااف و كنت بحال الدواء بالنسبة ليه. كنت ف ديك الفترة فالاعدادي و لكن ملي حليت عيني على ولاد اخرين تلهيت عليه و هادشي ماعرفتش العواقب ديالو حتى داز شحاال. تخليت عليه فالوقت اللي كان عمرو يفكرني نديرها و للأسف ولا مبلي بالكارو و الحشيش و جراو علي واليديه و حتى هو نفس الحلة ديال your boyfriend. باع حتى هو الحاسوب ديالو المهم ملي دويت معاه من ورا 3سنوات قال ليا نتي دمرتيني و تبدلتي بزاااف و من تما مبقيتش كانقض ندوي معاه كانشوف غير الصور ديالو فانستغرام. كنحاول مرة مرة ندوي معاه و لكن كايجاوبني على قد سؤالي و صافي.
المهم حتى كبرت و انا ف عمري 20 سنة دبا. عاد ندمت انني ضيعت الحب ديالو النقي و البريئ ليا اللي ما كنتش فاهماه و عاطياه قيمة. النتيجة اللي خلاتني نتخلى عليه ف أول لقاء ليا مع ولاد جداد للأسف